Sot është hera e 38-të që deputetët do të synojnë konstituimin e Kuvendit.
Megjithatë, është hera e parë që do ta tentojnë një gjë të tillë pas aktgjykimit të Gjykatës Kushtetuese.
Kushtetuesja i ka obliguar partitë e deputetët që brenda 30 ditësh ta konstituojnë Kuvendin.
Megjithatë, nuk ka sqaruar se çfarë ndodh nëse ky aktgjykim nuk respektohet.
Si rezultat, palët nuk po tërhiqen ende nga bindjet e veta.
VV-ja me komision e votim të fshehtë, kurse opozita kundër kësaj ideje, dhe kundër Albulena Haxhiut për kryeparlamentare.
“Deputetët e zgjedhur të Kuvendit të Republikës së Kosovës, në zbatim të paragrafit 1 të nenit 66 [Zgjedhja dhe Mandati] në ndërlidhje me nenin 67 [Zgjedhja e Kryetarit dhe Nënkryetarëve], nenin 70 [Mandati i Deputetëve] dhe nenin 74 [Ushtrimi i Funksionit] të Kushtetutës së Republikës së Kosovës, Kreun IV të Rregullores së Kuvendit të Republikës së Kosovës dhe në pajtim me këtë Aktgjykim duhet që sa më shpejt dhe jo më vonë se tridhjetë (30) ditë të përfundojnë seancën konstituive të Kuvendit duke zgjedhur Kryetarin dhe nënkryetarët e tij”,thuhet në aktgjykimin e Gjykatës Kushtetuese.
“E drejta për të propozuar Kryetarin/en e Kuvendit, e rezervuar për grupin më të madh parlamentar, është vendosur përmes Aktgjykimit në rastin KO119/14; (iv) propozimi i kandidatit për Kryetar/e të Kuvendit është i ndërlidhur në mënyrë të drejtpërdrejtë me arritjen e shumicës së votave të të gjithë deputetëve të Kuvendit, dhe si e tillë kjo e drejtë për propozimin e kandidatit për Kryetar/e të Kuvendit përbën njëkohësisht edhe detyrim për grupin më të madh parlamentar për bashkëpunim në mirëbesim dhe konsultim konstruktiv me grupet e tjera parlamentare për të gjetur konsensusin apo kompromisin e nevojshëm.” – thuhet ndër të tjera aty.
Edhe të mërkurën, ka dështuar formimi i komisionit të fshehtë për votimin e kryetarit të Kuvendit.
52 deputetë votuan për, kundër nuk pati, abstenim gjithashtu.
Në anën tjetër, shoqëria civile protestoi para Kuvendit, por as kjo nuk u bëri përshtypje deputetëve.
VV-ja insiston në votimin e fshehtë dhe Albulena Haxhiun, opozita kundërshton.
Në fillim të muajit maj, VV-ja ka propozuar formimin e një komisioni, i cili do të monitoronte votimin e fshehtë për kryetar të Kuvendit.
Një propozim i tillë ka ardhur pasi kandidatja e VV-së për kryetare të Kuvendit, Albulena Haxhiu, kishte dështuar 6 herë rresht t`i marrë votat e nevojshme.
Seanca për konstituimin e legjislaturës se nëntë ka filluar më 15 prill. Deri tani janë kaluar vetëm dy pika të agjendës.
Deputetët e kanë votuar raportin e Komisionit të përkohshëm për verifikimin e mandateve dhe janë betuar.
VV-ja nuk po e ndryshon kandidaten për kryetare të Kuvendit edhe pse PDK-së dhe AAK-ja janë shprehur të gatshme të votojnë një kandidatë tjetër për kryetar.
Tonet kanë nisur të ashpërsohen, dhe më së theksueshmi nga Ramush Haradinaj i AAK-së.
Haradinaj ka paralajmëruar edhe veprime ballafaquese ndaj ‘uzurpimit’ të vendit nga Albin Kurti.
Ky i fundit, antikushtetueshëm ushtron dy pushtete: ekzekutiv (si kryeministër në detyrë) dhe legjislativ (si dpeutet).
“Po i them seriozisht edhe atij (Kurtit) edhe asaj kandidatës (Haxhiu) mos e vazhdoni më kështu se nuk ka me ju shku më kështu, keni me ja pa sherrin edhe personalisht se nuk lejojmë me bë hajgare me vend pakufi, boll është boll”, tha ditë më parë Haradinaj.
Në anën tjetër, Kurti shprehet i paprekoupuar me gjendjen, duke thënë se Kosova “ka qeveri” dhe se çka mungon është veçse Kuvendi i Kosovës.
Tallja e madhe
“Konstatoj se ka kuorum”, e nis kryesuesi i seancës nga virtyti i moshës, Avni Dehari – “Nuk ka kuorum”, e përfundon ai me 100-e-kusur deputetë të pranishëm në sallë.
Vetëvendosja ka ofertë nga PDK se i ka 40 emra të votueshëm për kryetar kuvendi, përkatësisht të gjitë deputetët që s’kanë mbajtur post ministror gjatë mandatit të kaluar.
Nga AAK i kanë dhënë tri emra të votueshëm për ta: Glauk Konjufcën, Shqipe Selimin dhe Saranda Bogujevcin.
Albulena Haxhiu në anën tjetër duke folur për media ka “lutur” që qëndresa e saj e përhershme nuk është “as këmbënglulje, as ambicie” e saj personale, por “vendim i partisë”.
Kurti vazhdon të mos ketë marrëveshje politike me partitë politike dhe të mos deklarohte për gazetarë.
Kur deklarohet, thotë se “Kosova ka qeveri, në detyrë” dhe lë të kuptojë se do të vijojë të ushtrojë postin ekzekutiv krahas atij legjislativ – gjë shprehimisht e ndaluar në Kushtetutë të Kosovës.
Për më tepër në kundërshtim edhe me Ligjin për Qeverinë që e ka shkruar vet.
Memli Krasniqi, Kryetar i Partisë Demokratike të Kosovës pretendon se mund t’i grumbullojë votat për një qeveri të ish-opozitës po qe se Lumir Abdixhiku nga Lidhja Demokratike e Kosovës i ka 19 vota për atë qeveri. Nacionale
