Avokati dhe përfaqësuesi ligjor i Federatës së Futbollit të Kosovës, Taulant Hodaj, ka njoftuar sot se ka përfunduar bashkëpunimin me këtë institucion të futbollit kosovar.
Përmes një postimi në llogarinë e tij në Facebook, Hodaj ka shprehur keqardhjen për këtë vendim, duke shtuar se ai erdhi si rezultat i disa praktikave të përsëritura të FFK-së, që, sipas tij, ishin në kundërshtim me parimet e tij profesionale.
Një nga çështjet kryesore që ai përmendi ishte mënyra se si FFK ka trajtuar përfaqësimin e Kosovës në çështjen që ka të bëjë me Gjykatën e Arbitrazhit Sportiv (CAS) kundër Rumanisë. Hodaj e konsideron këtë qasje si një pengesë që mund të dëmtojë mundësitë e Kosovës për të fituar rastin dhe për të mbrojtur të drejtat e futbollistëve dhe ekipit kombëtar.
“Besoj se kjo qasje e FFK-së mund të dëmtojë mundësitë e Kosovës për të fituar rastin dhe për të mbrojtur të drejtat dhe reputacionin e futbollistëve dhe ekipit kombëtar,” tha Hodaj.
Megjithatë, ai theksoi se do të vazhdojë të mbështesë futbollistët, klubet dhe lojtarët e Kombëtares së Kosovës, duke e ruajtur rolin e tij si avokat dhe ekspert ligjor.
“Kosova ka një potencial të jashtëzakonshëm në futboll – lojtarë të talentuar, klube të angazhuara dhe një staf brenda FFK-së që punon me pasion. Ka qenë një nder dhe kënaqësi të bashkëpunoj me ta,” shtoi ai.
Në fund, Hodaj shprehu shpresën që Federata e Futbollit të Kosovës të vazhdojë të rritet dhe të forcojë kapacitetet e saj, për të arritur sukseset që futbolli kosovar meriton në skenën ndërkombëtare.
