Portugalia ka filluar procesin e njohjes së shtetësisë palestineze, me plane për ta përfunduar atë deri në shtator, tha qeveria të enjten.
Vendimi i Portugalisë vjen pasi Autoriteti Palestinez premtoi të përmbushë disa garanci, një numër shtetesh arabe treguan gatishmëri për të normalizuar lidhjet me Izraelin dhe në dritën e zhvillimeve “shumë shqetësuese” të luftës në Gaza, thuhet në deklaratë, shkruan CNN.
Njohja mund të ndodhë gjatë takimit të Asamblesë së Përgjithshme të Kombeve të Bashkuara në shtator, sipas deklaratës.
Njoftimi i Portugalisë vjen pas një takimi të bashkorganizuar nga Arabia Saudite dhe Franca në Nju Jork, i cili trajtoi “zgjidhjen paqësore të çështjes së Palestinës dhe zbatimin e zgjidhjes me dy shtete”, në të cilin shtetet arabe dhe myslimane për herë të parë lëshuan një thirrje të përbashkët për Hamasin që të çarmatoset dhe të heqë dorë nga pushteti në Rripin e Gazës, si pjesë e përpjekjeve për t’i dhënë fund luftës në territor.
