Pas një ndërprerjeje teknike që përfshiu sistemin e Policisë së Maqedonisë së Veriut në gjithë territorin e saj, autoritetet kanë konfirmuar se gjendja është kthyer në normalitet dhe qarkullimi në të gjitha pikat kufitare është normalizuar.
Rreth orës 17:00, Qendra Kombëtare për Menaxhim Kufitar (QKMK) kishte njoftuar për pezullimin e përkohshëm të hyrjes së automjeteve në territorin e Maqedonisë së Veriut, si pasojë e rënies së sistemit të policisë në këtë shtet fqinj. Kjo situatë kishte shkaktuar kolona të gjata dhe kontrolle të dyfishta në kufi.
Por, sipas informacioneve të fundit të konfirmuara nga ndihmësministri për komunikim me opinionin dhe çështje strategjike në Maqedoninë e Veriut, Muhamet Ismaili, ndërprerja kishte zgjatur rreth një orë e 30 minuta dhe më pas çështja teknike ishte rregulluar plotësisht.
“Rënia e sistemit të policisë në gjithë territorin e Maqedonisë së Veriut ka zgjatur rreth 1 orë e 30 minuta. Më pas çështja teknike është rregulluar. Kështu që edhe qarkullimi nëpër të gjitha pikat kufitare të Maqedonisë së Veriut është normalizuar”, ka deklaruar Ismaili për RTK-në.
Edhe QKMK ka dalë me një njoftim të ri për të konfirmuar rikthimin në funksion të sistemit dhe kthimin e gjendjes në normalitet.
“Të nderuar, ju informojmë se ka filluar të funksionojë sistemi i palës maqedonase dhe gjendja është kthyer në normalitet”, thuhet në njoftimin zyrtar të kësaj qendre që funksionon në kuadër të Ministrisë së Punëve të Brendshme të Kosovës.
