Izraeli ka bërë të ditur se ka bastisur disa qeli burgu pasi zyrtarët dëgjuan të burgosur duke bërë “shprehje gëzimi” gjatë një vale sulmesh ajrore iraniane kundër Izraelit, raporton CNN.
“Gjatë rundit të fundit të luftimeve, u dëgjuan tinguj festimi nga të burgosur kriminalë që janë banorë të territoreve palestineze” në një burg në Izraelin qendror, tha të dielën shërbimi izraelit i burgjeve.
Sipas shërbimit të burgjeve, njësia elitare “Metzada” u thirr për t’i bastisur qelitë dhe për t’i larguar të përfshirët.
Në një video të shpërndarë nga shërbimi i burgjeve, ushtarë të armatosur shihen duke hyrë me forcë në një qeli burgu, duke iu drejtuar me armë të burgosurve që ishin shtrirë në dysheme. Njëri nga burrat shihej i shtrirë përmbys, ndërsa një oficer ia lidhi duart me një lidhëse plastike. Një tjetër ishte me sy të lidhur. Disa burra më pas u nxorën nga qelitë, të përkulur, me duart e lidhura pas shpine.
Shërbimi i burgjeve tha se të burgosurit u dërguan para një tribunali disiplinor dhe “më pas u ndëshkuan”, pa specifikuar se si.
Sipas tyre, operacioni u krye si pjesë e politikës së “tolerancës zero” të Ministrit të Sigurisë Kombëtare, Itamar Ben Gvir, ndaj shprehjeve të mbështetjes për kundërshtarët e Izraelit.
Gjatë një vizite në Petah Tikva, qyteti në Izraelin qendror ku katër persona u vranë nga sulmet iraniane gjatë natës, Ben Gvir të hënën ritheksoi se autoritetet do të veprojnë kundër kujtdo që shfaq “gëzim” për sulmet e Iranit ndaj Izraelit.
“Tolerancë zero për këtë çështje. Policia ka arrestuar mjaft persona, dhe i mbështes – kjo është pikërisht politika ime”, tha Ben Gvir të hënën.
Ministri i ekstremit të djathtë iu referua “pamjeve” të rojeve të burgut që hynin në qeli me armë për të “rivendosur rendin” në burgje.
“Kjo është politika që dua”, tha ai. “Tolerancë zero për shfaqje gëzimi. Tolerancë zero për ata që mbështesin Iranin. Mbështetja për Iranin është mbështetje për terrorizmin, dhe kushdo që mbështet terrorin duhet të ndalohet”.
