Prokuroria Speciale dhe Policia e Kosovës kanë lëshuar komunikatë të përbashkët për aksionin e sotëm, të koduar “Qielli i thyer”, gjatë të cilit janë arrestuar 7 persona.
Ky operacion policor është realizuar në 25 lokacione të ndryshme dhe personat e arrestuar dyshohen për përfshirje në vepra penale: pjesëmarrja ose organizimi i grupit kriminal të organizuar; blerja, posedimi, shpërndarja dhe shitja e paautorizuar e narkotikëve; si dhe pastrimi i parave.
Ata dyshohet se kanë përdorur aplikacionin e njohur për komunikim të enkriptuar “SkyECC” për të organizuar aktivitetet e tyre kriminale.
Gjatë realizimit të urdhër kontrollit në këto lokacione është gjetur dhe sekuestruar:
• 638 gramë substancë narkotike e dyshuar si kokainë;
• Një ( 1 ) peshore për matjen e lëndëve narkotike;
• 11,065 euro para të gatshme;
• 34 automjete;
• Shtatë (7) armë zjarri;
• Dokumente personale me identitet të rremë;
• Pajisje elektronike;
• Dokumentacion i ndryshëm pronësor dhe financiar.
Në komunikatë thuhet se operacioni është mbështetur nga një bashkëpunim i ngushtë ndërkombëtar, përmes shkëmbimit të të dhënave me autoritetet belge, franceze, holandeze dhe agjencinë europiane Europol, duke siguruar koordinim të plotë ndërkufitar.
“Prokuroria Speciale dhe Policia e Kosovës mbesin të përkushtuara në luftimin e krimit të organizuar, duke synuar jo vetëm parandalimin, por edhe sjelljen para drejtësisë të atyre që cënojnë ligjin dhe rendin.”
