Gjimnazi “Hivzi Sulejmani” është sërish pjesë e Programit të Promovimit të Vlerave Humane (PVH), një iniciativë e organizuar nga Kryqi i Kuq i Kosovës, që ka për qëllim të inkurajojë të rinjtë të angazhohen në projekte shoqërore dhe të zhvillojnë vlera themelore si solidariteti, empatia dhe bashkëpunimi. Ky program ka mbështetje të madhe nga shkolla dhe komuniteti, pas suksesit të shkëlqyer të vitit të kaluar.
Në edicionin e kaluar, ekipi i nxënësve nga ky gjimnaz, bashkë me dy diseminatorët Majlinda Hykolli-Prebreza dhe Jeton Ismajli, arritën të fitonin vendin e parë me pesë projekte, përfshirë një projekt interkulturor që promovonte bashkëpunimin dhe respektin ndërmjet grupeve të ndryshme etnike. Ky sukses i ka frymëzuar ata që të angazhohen dhe më tej në aktivitete që sjellin përfitime për shoqërinë.
Këtë vit, grupi i nxënësve është i udhëhequr nga profesoresha Blenda Fetahu dhe psikologia Arta Hiseni, të cilat po i ndihmojnë ata të zhvillojnë dhe zbatojnë projekte me ndikim pozitiv. Nxënësit kanë përfunduar me sukses tre punëtori dhe janë të përkushtuar të kontribuojnë në zhvillimin e komunitetit të Fushë-Kosovës. Ata tashmë kanë filluar punën në projektet e tyre dhe do t’i prezantojnë ato pas përfundimit të garës.
Drejtori i gjimnazit, z. Amir Pllana, ka shprehur mbështetje të vazhdueshme për këtë iniciativë dhe ka inkurajuar nxënësit që të vazhdojnë me pasion dhe angazhim. Po ashtu, fotografi Bleart Fetahu është duke mbështetur promovimin e aktiviteteve të tyre përmes fotografive profesionale, që do të dokumentojnë përpjekjet dhe sukseset e këtij programi.
Ky angazhim i vazhdueshëm i Gjimnazit “Hivzi Sulejmani” në promovimin e vlerave humane tregon një shembull të shkëlqyer për nxënësit e rinj dhe për gjithë shoqërinë, duke i nxitur ata të angazhohen në aktivitete që kontribuojnë për një botë më të mirë.
