Presidenti serb Aleksandar Vuçiq deklaroi më 22 mars se do t’u kërkojë autoriteteve shtetërore të veprojnë në çdo kohë dhe në çdo vend në një mënyrë që mbron rendin dhe ligjin, duke theksuar se ata që nuk e bëjnë do të “ndryshohen”, njoftoi agjencia Beta.
“Ata policë që nuk duan të mbrojnë rendin dhe ligji do të zëvendësohen, prokurorët që nuk duan ta mbrojnë atë do të zëvendësohen”, tha Vuçiq në një bisedë me qytetarët në Leskovc, në Serbinë jugore, gjatë një vizite në rajonet e Toplicës dhe Jabllanicës.
Ai tha se “shumë para kanë hyrë në Serbi” për të “zbatuar një revolucion me ngjyrë”, por se ai nuk do të heqë dorë nga politikat e tij, por do të “luftojë edhe më fort dhe më fuqishëm”.
Vuçiq dhe përfaqësues të tjerë të qeverisë i kanë quajtur vazhdimisht protestat masive për prishjen e tendës së stacionit hekurudhor në Novi Sad dhe vdekjen e 16 personave si një përpjekje për një “revolucion me ngjyrë” dhe përmbysje të shtetit.
“Revolucione me ngjyra” quhen protestat që përmbysën regjimet autoritare në vendet ish-sovjetike.
Studentët që udhëheqin protestat në Serbi po kërkojnë që qeveria të mbajë përgjegjësi për vdekjen e 15 personave në shembjen e tendës në Novi Sad dhe këmbëngulin se ata nuk po bëjnë thirrje për ndryshimin e qeverisë. Ata po bllokojnë më shumë se 60 fakultete në qytete anembanë Serbisë.
Kërkesat e studentëve u mbështetën nga profesorët e tyre, pedagogët, avokatët, aktorët, fermerët dhe qytetarët e tjerë
Lidhur me deklaratën e raportuesit të Parlamentit Evropian për Serbinë, Tonino Picula, i cili tha se autoritetet serbe nuk kanë arritur t’u përgjigjen kërkesave të të gjithë protestuesve në muajt e fundit, kështu që mund të thuhet se “Serbia është në gjendje të pashpallur të jashtëzakonshme”, Vuçiq tha se “në kokën e Piculës” ekziston “gjendja e përhershme e jashtëzakonshme”.
“Ai ka një gjendje të vazhdueshme të jashtëzakonshme në kokën e tij dhe është shpallur shumë kohë më parë. Dhe shumë në Kroaci po ashtu,” tha Vuçiq në Vlasotinci, gjatë një vizite në rajonet e Toplicës dhe Jabllanicës.
Vuçiq deklaroi se do të takohet me Presidenten e Komisionit Evropian Ursula von der Leyen në Bruksel të martën, më 25 mars dhe, në lidhje me një letër të një grupi eurodeputetësh që kundërshtuan mbajtjen e takimit, tha se “në Serbi qytetarët do të zgjedhin qeverinë”.
Një grup prej 31 anëtarësh të Parlamentit Evropian i bëri thirrje von der Leyen në një letër që të rishqyrtojë synimin e saj për t’u takuar me Vuçiqin dhe në vend të kësaj të shfrytëzojë momentin për të thënë se “Serbisë i duhet urgjentisht një qeveri kalimtare”. REL
